Nouveau livre de Karim Kannouf.
Cahrazad d ammud wiss kuz n Karim Kannuf. D awardi i tenni ittexs umaru. Yusd d amedfur i Re3win n tayri : ttmunan di talgha d tumayt, maca tayri teghza da ugar xef min ittraja umeghri.
Cahrazad, d tcuni n arrimt d tcuni n yzli. Nettat i icuqen ul n umaru, taqessist awarn i tqessist. Marra izlan neddun s tufrayt, 3awd s uxarres i di ittwala wzrawi tudart war ghars bu unamk mbla nettat. D ijj n ulaghi n tayri war ittenfeliln, n tayri izedghen buhbel n umaru.
Ammud a yurm s tufrayin n umedyaz, s ucemmud n umutti deg yiman id itejjan tcuni n tqessisin. Cahrazad d taghbalt manis ttnessasent tiwalin, manis d ssfayn yezlan ixsen ad qedwn imewwas iqqnen tamazight, imewwas a ixsen ad carfen awal nnegh huma ad iqqim d atlay issdaw it
usemmid, uca ittawy it ghar uweddar… Maca s twuri n Kannuf, s tzemmar n yezlan ittawdn ad alsen tira i arrimet n wawal amazigh, ttawdn ad mmlen i ywdan tcuni n tutlayt n tayri zi ireddu wul.
Tayri deg wdlis a tesmun jar uxeyyeq d tumert, jar tarzugi d tezyudi, jar wbrid d wtla3, jar da d diha, jar rexxu d tibawt. Ameghri idaffar isuraf d imaynutn xef min izwarn, nettaf axarres nniän, nettaf awaln nnidn yuym iten umaru zi tala n twangimt nnes.
Asefru izdegh Kannuf. Kannuf izdegh asefru d manaya i ixs ad angh inint tqessisin, asneflul d adurri n umaru, d tazeddight, d tudart. Amaru izdegh izlan, izlan zedghen Kannuf, amn dinni jar asn tira, ixsen ad inint: Artum. D artum ittejjan azarwi ad yaru izlan, maca d izlan mani tayri war ttili d arrimt teddar jar imarayn (necc, Cahrazad).
Deg umeggar, tayri a war ittwarin tzemmar ad tili d ighghed i zi gha tekkar tmessi nnidn id angh gha iwcn izlan nnidn, rehriq nnidn, udm nnidn n wzrawi, maca deg yijj n wammud nnidn.
Abdelmottaleb Zizaoui (Tabridt n tghuri tamazight –tasdawt n Wejda-)